咸猪手炒青瓜

過年前，牛爸在超市買了一隻咸猪手在冰箱準備人多吃飯時加餸，今日清理冰箱時順手做埋晚餐，咸猪手是咸物，淨食始終覺得過咸，於是做了一餸一湯，先將猪手入滚水中火煲一小時，起骨留肉，骨可再煲半小時，放下蔬菜瓜類，已是一個靚湯，肉留下加些蔬菜炒，又是一個餸，兩個人食，再蒸一碟水蛋，已足夠一個晚餐啦。

材料：
己煲湯去骨咸猪手一隻
青瓜一條
細洋葱半個

調味：
鮑魚汁或蠔油一茶匙，白酒適量，黑胡椒碎適量。

1-猪手去皮切大粒，青瓜及洋葱均切成同一大小。
2-鑊中放小許油，放猪手爆香，下青瓜及洋葱炒透，贊白酒，加入調味拌勻即成。